«Тэрытарыяльны цэнтр сацыяльнага абслугоўвання насельніцтва Аршанскага раёна»

Міністэрства энергетыкі ад усёй душы павіншавала жыхароў аддзялення ТЦСАН у Тарчылаве

14.01.2026

У рамках дабрачыннай акцыі "Ад усёй душы" ў аддзяленні кругласутачнага знаходжання для грамадзян пажылога ўзросту і інвалідаў, размешчаным у вёсцы Тарчылава адбылося свята. Мерапрыемства паказала, як важна праяўляць клопат і ўвагу да старэйшага пакалення, якое мае патрэбу ў падтрымцы.

У гэты дзень у госці да пражываючых і работнікаў установы прыехалі намеснік міністра энергетыкі Рэспублікі Беларусь Сяргей Рэянтовіч, намеснік старшыні Аршанскага райвыканкама Анастасія Пракоф'ева, намеснік генеральнага дырэктара ДВА "Белпалівагаз" Дзмітрый Сергяенка, генеральны дырэктар УП "Віцебскаблгаз" Аляксандр Бранцэвіч, генеральны дырэктар РУП "Віцебскэнерга" Сяргей Шыдлоўскі.

Звяртаючыся да жыхароў аддзялення, намеснік міністра энергетыкі Сяргей Рэянтовіч падкрэсліў:

– Клопат пра людзей старэйшага пакалення - гэта не проста добрая традыцыя, а наш агульны абавязак. Вы пражылі вялікае жыццё, унеслі важкі ўклад у развіццё краіны, і сёння мы тут, каб выказаць вам шчырую падзяку, падарыць цяпло і ўвагу.

Госці ўручылі падарункі ўсім пражываючым у аддзяленні, а таксама перадалі ўстанове сертыфікат на паляпшэнне матэрыяльна-тэхнічнай базы, што дасць магчымасць стварыць яшчэ больш камфортныя ўмовы для пражываючых.

Дырэктар ТЦСАН Кацярына Муранкова і ветэран працы Інэса Жалудова ад усяго калектыву і пастаяльцаў падзякавалі гасцям за візіт і падтрымку.

"Для нас, людзей старэйшага пакалення, асабліва важна адчуваць, што пра нас памятаюць і клапоцяцца. Такая ўвага сагравае душу, усяляе ўпэўненасць і дае сілы. Дзякуй Вам за дабро, за павагу і за тое, што не забываеце пенсіянераў", — сказала Інэса Жалудова.

Затым гасцям уручылі цёплыя падарункі, выкананыя клапатлівымі рукамі жыхароў аддзялення.

Святочную атмасферу дапоўніла канцэртная праграма з удзелам творчых калектываў УП "Віцебскаблгаз". Выкананыя артыстамі любімыя песні мінулых гадоў выклікалі жывы водгук у гледачоў, якія з радасцю падпявалі знаёмым мелодыям.