«Тэрытарыяльны цэнтр сацыяльнага абслугоўвання насельніцтва Аршанскага раёна»

Святло надзеі запалілі разам!

08.01.2026

Напярэдадні светлага свята Нараджэння Хрыстова ў бібліятэцы г. Барань панавала атмасфера сапраўднага цуду. Тут прайшла добрая сустрэча, арганізаваная кіраўніком ГА "БелАДДIiМI" Лукіной Тамарай ва ўзаемадзеянні з загадчыкам філіяла тэрытарыяльнага цэнтра Рабавай Юліяй і кіраўніком клуба "Кветачка-Вясёлка" Лазарук Ірынай.

Гасцямі свята сталі асаблівыя дзеткі і іх бацькі. Разам, дарослыя і хлопцы стваралі чараўніцтва сваімі рукамі. Кожны напісаў ці намаляваў сваё самае запаветнае каляднае пажаданне, беражліва заляпіў яго ў канверцік, упрыгожыўшы зверху яркай зоркай. Гэтыя "лісты надзеі" сталі галоўнымі ўпрыгожваннямі бліскучага агнямі чароўнага дрэва, якое "вырасла" прама ў чытальнай зале.

Але на гэтым цуды не скончыліся! Удзельнікі ціхенька нашапталі дрэву яшчэ і самыя цёплыя пажаданні для сваіх родных і блізкіх, павязаўшы на яго галіны рознакаляровыя стужачкі — сімвалы веры ў тое, што ўсё загаданае абавязкова збудзецца.

Вечар напоўніўся творчасцю: госці з задавальненнем малявалі, пагулялі і зладзілі сапраўдную святочную фотасесію. А кульмінацыяй стала агульная фатаграфія на ганку бібліятэкі, дзе ў зімовых прыцемках ярка ўспыхнулі бенгальскія агні і святочныя хлапушкі, асвятліўшы ўсмешкі і шчаслівыя вочы ўсіх удзельнікаў.

Гэты вечар зноў даказаў: калі сэрцы адкрыты, а рукі гатовыя тварыць дабро, нават самы халодны зімовы вечар становіцца светлым і цёплым. Хай надзеі, запаленыя ў чароўнага дрэва, абавязкова знойдуць дарогу да выканання!