«Тэрытарыяльны цэнтр сацыяльнага абслугоўвання насельніцтва Аршанскага раёна»

Актыўнасці ў АКЗ

17.11.2025

У аддзяленні кругласутачнага знаходжання для грамадзян пажылога ўзросту і інвалідаў прайшла неверагодна добрая сустрэча! Супрацоўнікі філіяла тэрытарыяльнага цэнтра г. Барань наведалі пражываючых. Яны прыехалі ў госці да пражываючых з багатымі дарамі: хатняй выпечкай, прысмакамі і слоічкамі рознага духмянага варэння, якое перадалі з пажаданнямі дабра, здароўя, бадзёрасці, весялосці, шчасця наведвальнікі бараньскага філіяла.

Атмасферу свята ствараў паэт Фёдар Васько. Ён чытаў пацешныя вершы і гумарыстычныя апавяданні, выклікаючы ўсмешкі і апладысменты. Нашы слоічкі з варэннем з жартоўнымі назвамі тут жа натхнілі яго на імгненную імправізацыю — Фёдар Фёдаравіч на хаду складаў рыфмаваныя радкі да арыгінальных назваў на слоічках, чым выклікаў усеагульнае захапленне і смех.

Яшчэ адным кранальным момантам стала стварэнне "Гірлянды запаветных жаданняў". Кожны пражываючы, загадаўшы жаданне, прымацоўваў да гірлянды свой сцяжок. І для таго каб гэтыя мары абавязкова спраўдзіліся, наведвальніцы філіяла ўрачыста ўзялі на сябе ролю навагодніх Снягурак, паабяцаўшы дапамагчы ў іх выкананні.

Не абышлося і без выяўленчага мастацтва. Жадаючыя змаглі адчуць сябе сапраўднымі мастакамі і пад сяброўскія апладысменты стварылі цікавыя карціны.

Скончылася гэтая выдатная сустрэча танцамі і добрымі пажаданнямі адзін аднаму. Жыхары цёпла праводзілі гасцей і з нецярпеннем чакаюць новай сустрэчы.